تدوکا وخت اٹ بلوچستان نا وسائل آتابابت غلط فیصلہ کننگانے۔ صدر عارف علوی

Spread the love

کوئٹہ( نشست ڈیسک) بلوچستان گرین ٹریکٹر پروگرام“ نا بنائی دود آن تران کرسا کرے صدر مملکت پاکستان ڈاکٹر عارف علوی پاریے کہ بلوچستان خیسن تا ڈغار ئسے و مخلوق خواری کش ءُ، داڑے کشاری پیدوار اٹی ودکی تون اوار اوار دیر انا وئیل انا مون ءِ توننگ ہم المی ءِ ہراڑکن خیالداری و گچین حکمت عملی نا گُرج ءِ ، بلوچستان اٹی کشت وکشار ءِ مون آ دننگ و شون تننگ کن گرین ٹریکٹر پروگرام تون اوار ایلو برجاڈٹ آک پائیدار کشاری شونداری نا ضمانت ءُ۔
داوخت آ گورنر بلوچستان سید ظہور احمد آغا، وزیراعلیٰ بلوچستان جام کمال خان، صوبائی وزیر کشت وکشار انجینئر زمرک خان اچکزئی ئسک ہم دا پروگرام اٹ ساڑی اسور۔
صدر مملکت نا پاننگ ئس کہ بلوچستان قدرتی وسیلہ غاتیان شپ ءُ صوبہ اسے وخت اس کہ لائیو اسٹاک اٹی جم ملکی پیدوار اٹی اسہ بھلو حصہ دار ءِ۔ ساہدار توننگ و کشت و کشار پیغمبرآتا کسب ءِ و دا ہڑتوم آ کسب آک انسانی تاریخ تون وابستہ ءُ وخت اتون اوارا وار انسانی کچ ودا تو کشت وکشار نا مون آ دننگ و شونداری کن ہم پوسکن ءُ وڑوڈول مون آ بس و شونداری نا داچرجوئی وخت اتون برجاءِ ساڑی آ دور اٹی اسپرے ایریگیشن، واٹر چینل و ڈرپ ایریگیشن نا کمک اٹ پوسکن آ وڑوڈول آتے اٹ کشاری شونداری مننگ کیک اوپارے کہ ویتنام نا کوسٹل ایریا بلوچستان آن ہم چنک ءِ و بنائی وڑاٹ فشریز نا بشخ اٹی پاکستان و ویتنام نا ایکسپورٹ مسٹ آن چار سد ملین ڈالر ئسر ویتنام افزائش فشریز آ گچین حکمت عملی و یکسوئی اٹ کاریم کرے و اینو او تینا ایکسپورٹ ءِ مسہ سد ملین ڈالر آن 10بلین ڈالر اسکان درینے۔ لائیو اسٹاک ءِ شون ترسا اسہ بھلو زرمبادلہ اس کٹیا کننگ مریک،بیرہ چین سالانہ 70ارب ڈالر نا حلال سُو امپورٹ کیک پاکستان نا گڑاس علاقہ غاتے ٹی ساہدار تے ٹی مروک آ کھر و منہ انا ناجوڑ نا مون ءِ تورسا حلال سُو انا ایکسپورٹ ءِ بھاز ودفنگ مریک۔ بلوچستان نا شونداری کن داجاگہ نا گچین مروک آ اسمبلی نا باسک آتے سہی سمت اٹ فیصلہ کرسا پائیدار شونداری نا چرجوئی کن تینا متحرک کڑد ءِ ادا کروئی مریک اوپارے کہ مستین اٹ بلوچستان نا معدنی وسیلہ غاتا بابت غلط فیصلہ کننگا ولے ساڑی حکومت گچینی کن گام گیج کننگ ءِ و اومیت ءِ مستین نا دا باندات آتے زوت ایسر کننگک۔ صدر عارف علوی پارے کہ بلوچستان تون است اٹ مہرومریبت ءِ و ہروار دورہ کوئٹہ نا وخت آ آبی حالیت آتیا گپ وتران کننگ ءِ المی تکیوہ کہ داہیت است بڈ ءِ کہ بلوچستان حکومت دااہم وئیل آ پورا سنجیدگی اٹ کاریم کننگ ءِ۔ وزیراعلیٰ بلوچستان پارے کہ کوئٹہ ٹی ہڑدے ئی نا دیر انا گرج 20ملین گیلن ءِ و کاریم اٹ اتوک آ دیر ءِ دُوارہ کاریم اٹ اتنگ نا قابل جوڑ کننگ کن ری سائیکلنگ نا ڈٹ آتیا کاریم برجاءِ۔
ہندن صوبائی حکومت نا دا گام گیج آخبت اٹ دیر انا گرج آتے پورو کننگ اٹ کمکار مرو۔ اوپارے کہ لائیو اسٹاک کشت وکشار و معدنی وسیلہ غاتے سہی وڑاٹ استوار کرسامعاشی و اقتصادی شونداری و روزگار نا فراوانی نا پوسکن ءُ وارخواہی ودی کننگ مریک۔
سندھ انا علاقہ تھر دانا پیدوار درور ءِ ہراڑے کولاپیش تمنگ آن مست مخلوق نا سیبو پِر انا دیر آن مروک آ فصل آتیا ئس و خشک سالی نا حالیت آتے ٹی مخلوق نا اسے بلو کچ ئس ہموکان ہمپ و بٹ کریکہ ولے کولا نا کانڑتیان پد داسہ حالیت آک یکسر بدل ءُ۔
صدر مملکت پارے کہ کورونا نا جہانی دین اٹی ہمسایہ ملک آتون اوار شون ہلوک ملک آتا معیشت توس ولے پاکستان نا گچین حکمت عملی نا سوب داڑے نسخان نا جم کچ ایلو ملک آتا مقابلہ ٹی کم ئس۔
صدر مملکت ڈاکٹر عارف علوی مُستی پارے کہ ملک انا مچ آ ادارہ غاتے تے خورہ لگاکہ عمران خان کرپشن نا مون ءِ توننگ کن سنجیدہ و پبی گام گیج کرینے۔ حکومت کرپشن نا مون ءِ تو تہوکہ تو پیسہ غاتا پیشن دننگ منہ بندغ آتا کمک اٹ پیشن نا ملک آ گدریفنگ نا عمل برجاسلیسکہ۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*

error: Content is protected !!