عارف ضیاہ صفت نا گواچی مسونے

Spread the love

نوشت: نذیر ساغر


جاگہ ئس دنیا نوشت کیک تو باز بڑز نوشت کیک، جاگہ ئس نوشت کیک تو بیرہ تینے بڑز کننگ کن نوشت کیک۔ تینا بڑزی کن لکھوکا نوشت تینٹ نوشتکار ءِ باز زو ڈغار آ بٹک پدان ہرانا ڈس او نشان آک ہم دو بفسہ وختس کہ گچینا نوشت آک ایلو بندغ آتے سوچنگ آ مجبور کیرہ ، بڑزنگا نوشت آتیٹی ہیل کننگ کن بھلو جستجو ئس ودی مریک اوداڑان راہشونی نا چندی کسرک ہم ملنگرہ دنکہ”موپساں” نا افسانہ ”محبت اور انتقام” ءِ خواننگ آن پد انسانی ذہن سوچنگ آ بیوس مریک ہراٹی لمہ نا جوزہ غاک تا احساس باز زیبائی ٹی مونا بریک کہ لمہ امر تینا مار انا بدلہ ئے ہلیک ہراٹی جوزہ و جنون تینا کمال نا ہد آ نظر بریک، دا افسانہ ئے خواننگ آن پد جوزہ نا اسہ پین دروشم اس مونا بریک ہرادے نہ مہالو بنگوسن او نئے خناسن۔ داکان بیدس گڑاس پین بڑز نوشتہ مروکو افسانہ کہ کنا مطالعہ غان گدرینگار ہراتا ذکر ای داڑے نمتون کننگ ضروری سرپند مریوہ اوفتیٹی "دوعادتوں کی مجبوری، عورت اور شیر، آدھے گنھٹے کا خدا، انوکھا انتقام، شکستہ پر، موپاساں نا بے گناہ، چیخو ف نا شڑط، او چندی پین اندونو تخلیقی کمال اریر ہرافتے خواننگ آن بندغ سیرکپک، دافتے اخس مطالعہ کیس ہموخس ملاسی پین ودک۔ گڑا ملاسی کٹک ہراڑے؟ امو نوشت آن ہرانا علم تون تعلق مف ہراٹی کہ بیرہ روایت پرستی، نفرت، سنگتی، سفت، خاترداری، پن کٹنگ او ٹھیکیداری نا ہیت مرے۔
وختس کہ براہوئی افسانہ غاتیٹی عارف ضیا نا افسانہ ‘مسٹمیکو وار پاہو نا سزا’ ئے خواننگ نا اتفاق مس، تو دادے مطالعہ غان پد اسہ وار تو حیران مسوٹ کہ ای انتس خواناٹ، کنا تو اسل کاٹم اڑسینگا، افسانہ نا اولیکا لوز نظام دا افسانہ ٹی اسہ بندغسے ہرانا کرداربیان کننگانے اندا ہی لوز آن بناہ مریک، افسانہ مریک امر؟ کنا خیال افسانہ نا فن و ہیئت آن نا بلد مننگ اوا سہ قصہ اس نوشت کننگ افسانہ پاننگپک واقعہ او خیال آتے درشان کننگ افسانہ پانگپک اواسہ بیرہ قصہ اس پاننگک ۔ افسانہ نا تینا اسہ فن و ہیئت اسے ہراٹی کلان مست بیانیہ نا خیال تخنگک ولے داٹی دانا اچو درک اس خنگپک دنکہ فن نا بنیاد آ "ایچ جی ویلز” پاہک کہ افسانہ امودے ہرا قاری نا جوزہ غاتے بڑز کے۔ انت حقیقتا عارف ضیاہ نا دا افسانہ ئے خواننگ آن قاری نا جوزہ غاک بڑز مریرہ؟ انت دا افسانہ قاری نا دماغ نا تار تے سرفک؟ انت داٹی امو جستجو ارے، ہرادے قاری وار وار خواننگ آ مجبور مرے؟ دنکہ ای” کرشن چندر” نا "آدھے گھنٹے کا خدائے” دہ(دس) وار آن زیات خواناٹ است کنا خواہک کہ دہ وار پین خوانوتہ۔ انت دا جستجوئے عارف ضیاہ نا افسانہ غاک ودی کیرہ؟ ہراٹی قدم قدم آ کمیک پاش خننگرہ۔ ہرافتیا اسہ مکمل او کتابس نوشتہ مننگ کیک خیر دا افسانہ نا ای اندونو گڑاس کمی نما مونا اتنگ اٹ ہرافتے خننگ آن دماغ ٹی لاعلمی او حیرانی نا ڈنگ لگک۔ اوفتا زیہا علمی او دعوی کننگک ہسے آمخی اس نظر بریک۔ دا افسانہ ٹی نظام پنی آ بندغ ئے انداخس مجبور او بیوس ظاہر کننگانے جائی نا نظام انداخس بیوس او بندغ اس ئس کہ تینا جند، ذات ، قوم او پن آن ہم بلد الو۔ اگہ کس اسے تینا وجود نا سماہ مف تو اودے گنوک پارہ، دننگا گنوک او دیوانہ ئے سزا تننگ نا ضرورت انت ئس؟
براہوئی نا قولس یاد بریک کہ” غریب ئے سیال اف” اگہ نظام گنوکے یا غریب اسے گڑا نظام ئے براہوئی، اوغان او پنجابیک انتکن تینا سیال کننگ خواہار؟ نظامے جاگس مجبور او جہس کچک نا چوٹ انگا لٹک پاننگانے گڑا دا قصہ ٹی ای اچ سرپند متئوٹ کہ نظام اسہ مجبور یا شیطانو بندغ اسے دانا فیصلہ ئے مصنف نمتون تینٹ کروئے۔ افسانہ نوشتوک نا منہ پین بند نما موناٹو داڑان نم تینٹ فیصلہ کننگ کیرے "ہراتم کہ مجلس اسیٹی نظام نا قوم او ذات نا ہیت مسکہ تو ہر اسٹ اودے تینا پارہ غا چکاکہ گڑا کس پاریکہ کہ نظام براہوئی اسے انداخاتران نظام ننائے، کس دروشم نا ردٹ اودے اوغان خیال کریکہ، خلق نا ماسٹر پنجابی اس او پاریکہ نظام نا لاغر آ بدن او چنکا بالاد آن او پنجابی اس مروئے” کلان مست انسان نا قوم و زبان او ذات، ثقافت آن چاہنگرہ انت نظام ئے دنیا نا بازنگا زبان آتیا عبور اس؟ ہراڑان نظام نا جند نا معلومداری متئوکہ؟ انت نظام تینا داپار ایپار نا ہر قوم نا ثقافت آن واقف اس کہ اودے سجمنگ داخس مشکل ئس کہ اونا پہچان مننگ کتئوکہ کہ اونا ثقافت ہراکان ئے۔
انسان نا زندگی ٹی انسان نا لہجہ نا بھلو عمل دخل اسے انت نظام نا لہجہ غان دا سماہ تمتوکہ کہ نظام، پنجابی اوغان یا براہوئی ئسے۔ گڑا اسہ بندغس دروشم نا بنیاد آ اودے اوغان تکاکہ ئندن لاغر آ بدن او چنکا بالاد دروشم نا ارٹمیکو پنے اندا بنیاد آ خلق نا ماسٹر اودے پنجابی ئس قرار تسکہ۔ انت دا کل نا زبان و ثقافت اسہ ایلو تون ملرہ؟ ہرافتیان نظام نا درستی راستی مننگ آ مشکل ودی مننگ ئس۔ اندن ای دا بند ٹی نوشتوک تینٹ نوشتہ کرسہ فیصلہ ہم کیک پاہک "کنا نزد ٹی نظام بے قوم اسکہ او اگہ قومی او بندغس مسکہ تو اودے اسہ مخ تف مسکہ، انت مصنف ئے دا حق ارے کہ او گڑاتا تینٹ فیصلہ ئے کے؟ انت نوشتہ ٹی فیصلہ نا مصنف ئے حق تننگانے؟ دیہس کہ ڈیتھ آف آتھر نا تھیوری ئے خواننگ آن پد فیصلہ تینا جاگہ غا، مصنف نا ذات ای مش مریک اندن مصنف جاگس ناپوہی ٹی نوشتہ کرسہ پارینے کہ "مسیت نا ملا غان بیدس دھن چاہ کہ خلق پوک چُنہ نا ودی مننگ او خف اٹ تہ بانگ تننگ آن ہلیس اوتا برام تے آ نکاح تفننگ مڑدہ غاتے غسل، کفن او دعا و فاتحہ ہر کاریم کن ملا نا مننگ ضروری ئے۔ گڑا مصنف آن دا سوال ئے کہ انت شار ئٹی دا کاریمک ملا نا افس ؟
افسانہ ٹی مصنف نا جند خلقنا نا زندے اواری او جوانی ٹی تدیفنگ نا فیصلہ ئے ہم تینٹ کیک پاہک کہ خلقنا بندغاک اسے ایلوتون تفوک مریرہ گڑا ولے دا افسانہ ٹی خلق نا مخلوق ئے ظالم، ناروا، ناترس پیش کننگانے؟ سوج دادے کہ انت وختس عارف ضیاہ خلق اسیٹی منہ دی مسونے؟ او خلقی زند ئے خڑک آن خنانے؟ یا ہندن شار ٹی تولوک، دا کلے نوشتہ کرینے، اونا خلقی زند نا بابت معلومداری باز کم خننگک، اندا خاتران خلقی زندے بیان کننگ نا لائخی تختنے۔
ایلو داکہ نظام نا قصور انتے کہ او ہر جاگہ پنجہ او بونڈا، مچ او لغت کننگک، نوشتوک نا جند دا ہم نوشتہ کرینے کہ پنجہ بونڈا کروکاک تو بازو ولے نصحیت کروکو کس اف، نوشتوک نا لوزآتیان دا معلوم مریک کہ خلق ٹی نظام تون کس ہم جوانی کتنے ہر بندغ تینا ذاتی مسخت آتیکن اونا استحصال ئے کرینے گڑا ظلم تو کل کرینو ولے حوالدار کرم خان تنیا انتئے ظالم پاننگک، خلق نا ایلو کل بندغاک ہم اندا ظلم نا بشخ اریر ولے او انتئے ظالم پاننگپسہ اگہ حوالدار کرم خان داخس بھلو ظالم او بندغس اس ئس گڑا ارا بندغاک نظام تون کہ ظلم کریسور او بندغاتیان نظام نا بدلہ ئے انتئے التئو۔ دا افسانہ ئے خواننگ آن اونا علمی کچ ساف ظاہر خننگک، دھن کہ دنیا ٹی اندونو تھیوری ہم اریر ہرافتے خواننگ او سمجنگ کن چندی زندگیک بکار مریرہ گڑا نن دا فیصلہ کننگ کینہ کہ امو علم ہراٹی جوزہ نا عمل او غلامی نا زنجیر آتے پرغنگ نا طاقت اوا سہ قوم و ادب سے فائدہ تننگ ناچاشنی مرے،ولے دا افسانہ ٹی فن نا اوٹی تو مر مر اسکان ہم درک اف، گڑا دننگا نوشت آتیان انت شون و شونداری نا ہیتاتے کننگ کرون۔
عارف ضیاہ نا افسانہ بلکہ افسانہ غاتے خواننگ آن پد ہچو جاگس دا پاننگ مفک کہ دننگا افسانہ غاک راجی شون و شونہالی ٹی بشخ النگ کرور، اگہ فن نا گپ مرے گڑا کنا خیال فن نا زبر نا پام ام کننگتنے افسانہ ئے خواننگ آن پد افسانہ نا جند کتاب نا تبصرہ غاتے خواننگ آ مجبور کرے اولیکا زندان نا پنٹ افضل مراد، نا تبصرہ ئس ہرادے خواننگ آن پد کنے دا خواجہ نا علم آ باز بے حد افسوس مس، انت تبصرہ اندن مریک؟ کنے لگک افضل مراد بیرہ کتاب نا ٹائٹل آ تبصرہ کرینے نہ کہ کتاب نا جند آ ، کتاب نا ٹائٹل زندان، لوزے مچٹ مونی پدی کرینے نہ کہ افسانہ غاتا جوانی او نزوری او کتاب نا فن او فکر نا بابت تینا خیال آتے درشان کرینے ، لوز گنڈنگ آن بیدس دا تبصرہ، تبصرہ غان خالی ئے کنا خیال دا تبصرہ ئے، تبصرہ پاننگ علم تون گستاخی ارے، انت دا افسانہ غاتیٹی فنی و فکری نزوری اف؟ یا افضل مراد دافتے خوانتنے، یا اگہ خوانانے تا تو اودے سمجھ بتنو، یا سنگتی او خیالداری نا سوب آن عارف ضیاہ سفت نا گواچی مسونے۔
ارٹمیکو تبصرہ خواجہ وحید زہیر نا ‘زندان نا گواچی’ نا پنٹ اٹی ئے۔ دا خواجہ نا تبصرہ نا اولیکا لوز، زند نیامت او رحمت اسے، خواجہ گڑا نظام نا باروٹ انت پاسہ کہ اونا زند نیامت اس ئس یا زحمت اس ئس، او جاگس مونی تینٹ تینا نوشت اسیٹی پاہک کہ "زند اگہ خرابے تو بندغ کن عذاب ئے داسہ گڑا ہچ سمجھ بننگ اف کہ زند نیامت ئے رحمت و خراب ئے یا عزابے خواجہ نا تبصرہ تون افسانہ غاتا چنکو خڑکی ئس ہم مننگ اف۔ کنے لگک دا افسانہ غاک، وحید زہیر نا نظرآن گدرینگتنو، اگر گدرینگارہ تو تبصرہ نا بشخ جور مسرہ، یا توعارف ضیاہ اوتا نگاہ ٹی اسہ کامل او نوشتہ کاراسے یا جید فکر نا بنیاد آ نوشتہ کننگے ہراڑان انکارکننگ مفک۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*

error: Content is protected !!