تخلیق و ننا تخلیقی لائخی

Spread the love

نوشت:نذیر ساغر

ادب نا دنیا ٹی نن ہندنو شاعری او نثر تخلیق کننگ ان، ہرافتا زندہ مننگ نا تعلقداری ننا ذات تون ءِ ہراتم اسکان نن زندہ اُن ننا تخلیق ہم نن تون اوارزندہ ءِ ہراتم نن دنیا غان رخصت کرین تو ننا تخلیق ہم ننتون اوار دا دنیا غان رخصت مریک، ہراتم اسکان کہ نن زندہ تینا شاعری او نثراتے زورٹ صفت کرفسہ زندہ تخنہ انتئے کہ ننا تخلیق ٹی او وس و طاقت اف کہ تینے مدام زندہ تخنگ کے پاننگ مریک کہ دافتا ادبی دنیا ٹی زندہ مننگ نا سوب امو خواجہ نا جند ئس ہرانا خاتر و خاطرداری نا سوب آن کل اودے وا وا کریرہ او داد تسورہ وختس کہ تخلیقار نا جند خن تے تر کرے تو اونا تخلیق نا پنءِ الوکو ہم کس مفرو۔ سوال دا ودی مریک کہ ننا تخلیق ٹی داخس کمال انتئے اف دانا چندی سوب اک مننگ کیرہ ولے کنا خیال ٹی داخاتران پد تموکے ننا مطلب ادب نہ بلکہ تینا ذات مریک ہرادے نن بھلن کننگ نا پدٹ ہر وخت تموک ارین او تخلیق نا جندے داخہ قدر تفنہ داسا سوب دادے کہ داسکان ننا وجود گندان پھرے، تاکہ اونا سفائی متنے جواننگا تخلیق نازل مفک، نن ہروخت قلم نا نوکے ریفسہ تسلی ایتنہ کہ نے شاد آتیتی خلینہ ولے اسل اٹ دادے زار تیٹی خلنگ ان گڑا او قلم یعنی براہوئی ادیب نا قلم جوانو تخلیق کیک امرَ؟ ہاں ہرا وخت آ تخلیق نا بلنی نا ہیت زوراٙٹ مریک گڑا اوڑان ای ہم انکار کننگ کپرہ بیرہ دا پاوہ کہ او تخلیق نےکن بھلنے دنیا کن بھلن اف ہاں ای بیرہ ہمو تخلیق ئے بلن تکوہ ہراڑان چم چم ٹی نی تینا تخلیق ئے بھلن کننک خواسہ ولے اوڑتون ہم امنا کپسہ، اوڑے پاسہ کہ تینا ادب ئے شون تننگ کن بھلا ادب او تنقیدی تھیوری تا خواننگ ضروری اف تو انت دننگا رویہ ادب کن نسخان اف؟ کنا خیال پاہک اٹ و مٹ دا زنجیرتا خیالے کرون اینو خننہ کہ بھلا ادب او تنقید ننا ہم تخلیقی جمود ءِ ترندی ٹی پرغنگ نا کنڈا اننگے ہرانا داسکان ننے سد ہم تمنگ اف انتئے کہ دا ہمو عقلی آ طاقت ئے ہراڑان انکار کننگ مفک دھن کہ ننا تخلیق ہرا تینا وجود آن تینٹ نمن ئے گڑا اٹ و مٹ اسہ قوم اس دا سبک او ریفوکا تخلیق آتیا گزارہ کروئے، دا بے علمی آ بحث آتیا خف تورو، نن امو تخلیق آتیتی اختہ ان ہراڑے زبان و قوم اتون بیدس ناروائی آن پین اچس کننگ افن۔ ہرا تخلیقار کہ محبوب نا زلف نا یا جوزہ غاتا گواچی ئے مزہ نا ہیت کہ زلف اخس تینٹ زیبائے براہوئی شاعری اودے اموخس زیبائی ٹی بیان کننگ نا لائخ ہم اف پاننگ مریک اونا تخلیق امو زلف نا مونا ہم شرمندہ خننگک دھن کہ ہرا خنک ہرا زلف ئے زیبا پارہ ہرانا شیدائی مریرہ، او اونا تخلیق کننگ ٹی ہم چم کیرہ گڑا اے کنا بیوسا راج اوفتے نا انت اسینا الکونے گڑا کنا اے قوم نے عقل نا ضرورت ئے نی کہ ہرا بندغ آتا قوم اس اوتو عقل نا پنان ہم واقف افس داسکان جوزہ زندہ باد او مردہ باد ٹی زند تیر کننگ او۔ ولے نے اندنو بند غ نا ضرورت ئے ہرا زندہ باد و مردہ باد آن مر مریر۔
منہ دے اسیان براہوئی نوشتوک آتا تخلیقی کمال آتے خواننگ نا موقع دو بس، تو ای دا سرپند مسوٹ کہ دافتا مطالعہ کنا وخت ئے برباد کرے انتئے کہ دافتے خواننگ آن اچس دو بتئو ولے ایلو نیمہ غا اراٹ کہ دافتا خواننگ نا گڑاس فائدہ ہم مس او داخاتران کہ تخلیقارآتا تخلیق نا بابت نوشتہ کننگ نا کنڈا مچہ تب چکا او دا نوشت نما مونا بس۔

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*

error: Content is protected !!