بولان ادبی دیوان نا نشست

Spread the love

رپورٹ : محسن فگار

مچھ بولان تاریخی او شار اسے آن ایرتر ادب و سیاست نا پڑا ہم اسہ گیر اسے آن وسمء ہر دور و ہر صدی ٹی دا جاگہ نا باتیک تینا راج و تینا بولی تا شونداری کن مخ تفوک مسنو تدوکا دور نا خزم خواجہ غاتا چرجوئیء برجا تخسہ اوفتا کاروانء مون مستی دننگ کن بولان ادبی دیوان مچھ بولان نا ہمو اسٹنگا ادبی تنظیم ہرا کئی سختی سوری تتون سینہ ترسہ اسہ بھلو پندس خلسہ بے گڑتی و چرت آن تینا منزل نا پارہ غا چسپانی اٹ گام گیج کننگءِ ۔
بولان ادبی دیوان نا ادبی کاریمک تیوی راج نا مون آ پاش و بولان نا مہروان آ مخلص آ سنگت آک تینا مدد و کمک اٹ سالانہ تیوی بلوچستان سطح غا سیمینار اڈ ترسہ بننگو داکان بیدس پنی عالم دین ابن صفر شاہ صاحب نا کتاب ، شنز ، ہم چھاپ کرفسہ اسہ تاریخ اس رقم کریر ۔
تینا کاریم تا سلسلہء برجا تخسہ گدرینگوک آ دے تیٹ بولان ادبی دیوان نا بن ہنیکن اٹ تنظیم نا چئیرمین گل شہزاد نا کماشی ٹی اسہ مشاعرہ اس اڈ الک ہرا نا گچین آ مہمان کامریڈ قیوم کرد اس اعزازی مہمان تیٹ کامریڈ عنایت بلوچ و منظور ہاشم اسک ساڑی اسر مشاعرہ نا بنائے تلاوت کلام پاک آن کننگا ہرا نا بختاوریء مچھ نا پنی آ کہنہ مشق شاعر تنظیم نا جوائنٹ سیکرٹری خواجہ نواز تشنہ کٹا شونکاری نا دوداتے مچھ انا شان پنی آ شاعر جنرل سیکٹری جنرل خواجہ منیر غمخوار دوئی کرے
مشاعرہ غان گچین آ مہمان خواجہ قیوم کرد تران کرسہ پارے کہ سنئیر سنگت آتے بائدے پوسکُنا سنگت آتا است بڈی کرسہ جوان وڑاٹ اوفتا راہشونی کیر تاکہ او مون مستی زیبائی اٹ تینا لائخی تا درشانیء کیر او پارے اینو نا شاعری ٹی ہمو گڑا اف ہرا کہ درو نا شاعری ٹی ننے نظر بسکہ درو نا شاعری نا خول اٹ اسہ بسنی ئس خوندی ئس اینو نا شاعری ننے سرسری لگیک او پارے دنکہ فرانس اٹ انسانی مڈول اس قیمتی خوارتے اٹ باز زیبائی اٹ جوڑ کننگا کئی سرمایہ غاک اوڑا خڑچ مسر ولے ہراکہ گدرینگو کا صدی تیٹ انسانی مڈول دو ئنا محنت اٹ نقش و نگار مسہ سر دا مشین تے اٹ جوڑ مروکا مڈول آک اوفتا برابریء کننگ کتو ۔ او پارے کنا پاننگ نا مسخت درو نا شاعرک تینا ریاضت و مطالعہ نا خمیرے تینا شاعری ٹی درشان کریرہ اندا خاطران اوفتا شاعری تیٹ پختگی اس تو اینو شاعرک بائدے اوفتے خوانسہ اوفتے آن سبخ الیر ۔ او تینا تران نا گڈ سراٹ کل نا منتواری ہرفے
کامریڈ عنایت بلوچ تران کرسہ پارے اینو نا دا کچاری ٹی ساڑی مننگ کن کن بختاوری اسے کہ دا زیبا غا کچاری ٹی ساڑی مسٹ نما زیباغا شاعری تے بنگٹ او پارے ای بولان نا سنگت آتا مخلصیء سلام کیوہ او ادب نا شونداری کن بلا ناغہ کاریم کرسہ بننگو گڈ سر اٹ بولان نا سنگت آتا منتواریء ارفے
ارٹمیکو اعزازی مہمان منظورہاشم تران کرسہ پارے بولان ادبی دیوان مچھ نا ہمو متکن آ اسٹ انگا تنظیم ء ہرا کہ مچھ کوننگا پسماندہ غا شاران براہوی ادب نا نمائندگیء گچین وڑاٹ کننگء داکان بیدس دا جاگہ نا ورناتیٹ ادبی شعورے ہم ودفنگء او پارے بولان ادبی دیوان ننکن مچھ اٹ اسہ خوش بختی اسے۔
گڈ سر اٹ کل سنگت آتا منتواری ارفے
گڈ سرٹ تنظیم نا چئیر مین کہنہ مشق سنئیر شاعر خواجہ گل شہزاد کل ساڑی سنگت آتا منتواری ارفے
مشاعرہ ٹی ساڑی سنگت آتا پنک داوڑو
گل شہزاد ، گچین آ مہمان کامریڈ قیوم کرد ۔ اعزازی مہمان کامریڈ عنایت بلوچ ،اعزازی مہمان منظور ہاشم ۔ ستارسیلانی بلوچ ، نوازتشنہ ۔ منیرغمخوار ، عبدالنبی انجم ، جہانزیب زیبی ۔ الطاف الطافی ، راشد جانان ،ضیاءالحق فراز ، محسن فگار

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*

error: Content is protected !!