احساس ایمرجنسی کیش پروگرام ‘جوانی ونزوریک

Spread the love

نوشت: رحمان حمید


کورناوائرس ہرادے covid-19 نا پن ہم تننگانے دا اسہ موذی ومرض اسے ہراکہ گدروکا سال 2019 نا دسمبرٹی چین نا ووہان شارآن بناکرے دا موذی آوباداوخت اسکان تیویٰ دنیاے پلویڑکرینے ۔
کہ داوختا ہفتاد لکھ بندغ دا مرض ناگواچی مسنوواینونا دے اسکان دامرض آن زوال مروکابندغاتاکچ چار لکھ آن زیاتے :
ایلوملک آتا وڑ داڑے پاکستان ٹی ہم داوباغان بھلو کچ اسے ٹی مخلوق ذہمی مسونے ذہمی مروکاتا داوخت اسکان ناکچ لکھ اس مریک وپاکستان ٹی دامرض آن کہوکا بندغاک اِرا ہزارآن زیاتو:
دامرض انسانی راج اے ہراجانی زوالی وبیرانی تا گواچی کرے ہموڈول تیویٰ جہان نا گزران ومعیشت ءِ ہم تباہ کرے کہ غٹ دنیانا بھلا بھلا کاروباری آ مارکیٹ، بازار، کارخانہ وکمپنیک داڑن متاثرمرسہ ارب آڈالرتا نسخان نا شیف اٹ ہنار۔
ہرقسم نا کاروبارومارکیٹاک بندمسور۔ دافتےآن مخلوق وخاص کر دیہاڑی آ کاریم کروکا بندغ وپوریاگرک سخت متاثروفریشان مسور:
پاکستان ٹی ہم مُسہ تُواسکان لاک ڈاون اس خلنگا ہراڑن داجاگہ نا پورگرتپہ نیاڑی نرینہ غاک تینا گزران کہ بیخی زیات فریشان مسور:
ہنداپوریاگرتا فریشانی اے ھُرسہ داڑے پاکستان ٹی "احساس کیش گرانٹ ” نا پن ٹی اسہ پروگرام اس وفاقی حکومت نا پارہ غان داڈول درستی راستی کرفنگا کہ ہمو مخلوق ہرادے سرکاری نوکری اف یا پنشن اس ہلنگ اف ہرافک لاک ڈاون وروزگارنا بندی آن گزارانی پڑا زہمی مسونو اوفک موبائل آن 8171 آ اسہ میسج اس کرسہ دا پروگرام ٹی اوار مریر ہرافک حقداراسورتو ہندا پروگرام نا وسیلہ ٹی اوفتے دوانزدہ ہزارروپئی تننگک:
پوریاگر نرینہ ونیاڑی تے کہ یقیناًدااسہ گچینو مالی /گذرانی کمک اس مس ہراڑن چندی بندغاتا منہ دے کہ اُرانا ضرورت نا گڑاتا ہلنگ نا فریشانی زرس مُرمس۔
پاکستان ٹے ایلو صوبہ غا تون اوارداڑے بلوچستان وپدانوشکے نا ضلع ٹی ہم دا پروگرام نا بناکننگا۔ ہرانارداٹ شش صد آن زیات حقداراغریب نیاڑی ونرینہ تے احساس کیش گرانٹ پروگرام نا تہٹی پیسہ تننگا۔
ولے داپروگرام نا خوڑتی جاچ وخت آداٹی جوانی تون ارے بڑز سندا چندی نزوریک ہم مون آ بسور۔ اولی نزوری دا کہ داپروگرام ٹی مستحق نا رجسٹریشن نا اسٹنگا ذریعہ موبائل نیٹ ورک اس ۔ داسابلوچستان ٹی دونو چٹ بازجاگہ ارے ہراڑے داسکان موبائل نیٹ ورک نا آسراتی اف ہنداوڑ نوشکے ٹے ہم بے حساب آ خلق وپہوال آتیٹ داسکان موبائل نیٹ ورک نا آسراتی اف ۔ دا علاقہ تیٹ موبائل نیٹ ورک نا سہولت نہ مننگ نا اسہ بھلو وجہ اس دا علاقہ تا پاک افغان سیم نا پٹی آ مننگ نا سبب ءِ سیکورٹی خدشہ تا سبب داجاگہ تے موبائل نیٹ ورک نا آسراتی تے آن مُرتخنگانے ۔
دُنکہ یونین کونسل کیشنگی نا ماسواے اِرا خلق آن ایلو جاگہ تے آموبائل نیٹ ورک نا آسراتی اف ۔ ہنداوڑ نوشکے نا یونین کونسل ڈاک وانام بوستان نا تیویٰ خلق آتیٹ داسکان موبائل نا آسراتی کاٹم آن ہچ اف ۔ مل واحمدوال یونین کونسل نا بازاخلق آتیٹ نیٹ وورک اف ۔
داخلق آتا تعداد پنجاغن زیاتے ۔ وختس دا خلق آتیٹ کہ موبائل نیٹ ورک اف گڑا داجاگہ نا حقدارنیاڑی نرینہ غاک احساس کیش گرانٹ پروگرام ٹی رجسٹرڈ ہمر مننگ کریرہ ؟
مروئی تو دااسک کہ داخلق آتیٹ ساڑی مستحق آتسکان پین ڈیوائس ولوپ اسے نا ذریعہ ٹی دافتا مستحق آتسکان رسائی کرسہ اوفتے رجسٹرڈ کننگوس ۔ داسا دا خلق آتا مستحق آک دا پروگرام ٹی تینے وڑ نا وڑاسے ٹی رجسٹرڈ کرفینو بازاک تا پیسہ ہم ہلکنو ولے اوفتا کچ باز کمے :
ایلونزوی وبھلا ویل داپروگرام نا دامس کہ مچ آ ضلع ٹی پیسہ بشخنگ نا اسہ جاگہ اس مقررکننگاسس ہراکہ نوشکے بازار نا بھلا اسکول بوائزماڈل ہائی اسکول اس۔
داڑے ہم بازار نا خڑک نا کلی تے آن بروکا مستحق تے کہ آسراتی ومُرآن بروکاتے کہ بھلو خواری ئس اس ۔ اودُن کہ مُر خلق آتے آن دُنکہ زارو، عیسے چاہ ، قبول ،شکراپ، نصیرآباد، ہزارجفت ، خرینہ، مل ، احمدوال ، کیشنگی آن بروکا خاص کر پیرانگا ناجوڑومعذورانیاڑی نرینہ تے کہ بھلو خواری ئس اس۔ اسٹ دادے تیٹ لوکل گاڈیک بنداسور ارٹمی داخلق آتیٹ لوکل گاڈیک ہم کچ اٹ مریرہ ۔ کل آن بھلا خواری وفریشانی داوخت آمستحق تے دامسکہ کہ اوفک ہفتادمیل مُرآن سفر کرسہ داڑے پیسہ ہلنگ کہ بسورہ تو اوفتے داپاریسہ نااُمید کننگاکہ کہ نما بائیومیٹرک شَست نا ویرفکیشن سہی اف۔ اودے تیٹ نادرہ آفس ہم بند اس داسا بندغاتے کہ بھلوزحمت وخواری اس اسک کہ اوفتے ٹی بازکم خوانندہ وبندغ مسکہ کہ داوڑ نا ٹیکنیکل ویل ءِ پومروسُر ایلو خواری سفر نا اس کہ باز کم بندغاتے نوشکے بازار نا ایب کیب اٹ درستی اس مہمان نا وڑ خوندی کروس ولدا داہم معلوم الو کہ اونا دا انگوٹھاوالا مسلہ ہراوخت ایسر مرو۔ دُنکہ اسہ مستحق جنوزان نیاڑی اس ہرااُرانوشکے جمال آبادٹی ءِ اوپارے کہ تُواسے آن زیاتے کنکہ میسج بسونے کہ نی اہل اُس ہن تینا پیسہ تے ہل ای ہراتم احساس والا تاپیسہ بشخنگ نا جاگہ غا ہناٹ تو کنے داپاریسہ پیسہ تتورکہ نا شَست ءِ ننا بائیومیٹرک سسٹم ارفنگ اف ای نادرہ غا ہناٹ اوفک کنا شست ءِ ویری فائیڈ کریر واپس پیسہ ہلنگ کہ ہناٹ تو اوفک پاریر داسکان نا شَست والا ویل ارے ۔ انداوڑحوال اس ننے خلق مینگل نا اسہ نرینہ مستحق ئس ہم تس۔
داڑکہ دُن مروس کہ بجاے اسہ جاگہ اس ضلع ٹی پیسہ بشخنگ کہ مقررکننگان ہریونین کونسل ٹی اسہ جاگہ اس مقرر کننگوس گڑا مخلوق خاص کر ناجوڑاومعذوراذالبول ونرینہ تے داخس خوار مروئی تمتوکا۔
داپروگرام ٹی ایلو نزوری دا پاش مس کہ داٹی ہچو مخصوص تپہ سے کہ خاصو کوٹہ اس تخنگتوسس۔ دُنکہ اقلیت آک ، معذوراک ، ہجڑاک ایلو جنوزان آک دافتے کہ ہچو خاصو کوٹہ اس داپروگرام ٹی پن کننگ توسس۔
بائدے دُن مروس کہ ہرضلع ٹی اسیکہ اسسمنٹ اس دا رداٹ کنگوس کہ داڑے اقلیت آک اخسوہندن معذوروجنوزاک اخسو داھُرنگوس کہ داضلع ٹی ہجڑا ارے یااف ۔ دا کل تپہ تے ہُرسہ ہرضلع ٹی دافتے کن مخصوص کوٹہ جوڑ مروس۔
داپروگرام اس توجوانواس ولے دانا ہوم ورک اوڈول الوہراوڑ مروئی اس ہنداڑن بازا مستحق آک دا پیسہ تے آن داسکان محروم سلیسُر۔
ہندا طریقہ ضلعی سندا لاک ڈاون نا وخت آ راشن بشخنگ نا سلسلہ وطریقہ ٹی ہم خننگاکہ داٹی ہم جوانی تون اوار بازا نزوریک مونا بسور کہ راشن تا رجسٹریشن کہ تیویٰ ضلع ٹی اسٹنگا ڈپٹی کمشنر نا دفتر پن کننگاسس داسا مُر علاقہ تا مستحق آک داڑے سرمننگان گشیتری سلیسُر کس ءِ اگہ بندغ ئس اسک تو اونا پن درج مس اودے راشن ملا ولے کس ءِ اگہ بندغ الو تو اوڑکہ ہچس متئو:
خواست داگڑاناے کہ دُننگا وخت آ ہرااسہ علاقہ نا ہرااسہ پڑآن جاچ ہلنگاس اوڑکہ ہمووڑ پروگرام ءِ شون تننگ ءِ تاکہ کل حقدارک اوڑاسکان سرمننگ کیر:

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*

error: Content is protected !!