بنیادی صفحہ / براہوئی / “براہوئی بولی نا حالیت و لمئی بولی تادے، او یوسف مینگل نا نوشت آ ہیت و گپ

“براہوئی بولی نا حالیت و لمئی بولی تادے، او یوسف مینگل نا نوشت آ ہیت و گپ

نوشت: نظام نزیری

ہراتم اسےتخلیق کار ئسےنا تخلیق آ ہیت مریک یااونا تخلیق نا تنقیدی جاچ ءِ ہلوئی تمک گُڑا داڑکن اسے بلو علم ئسےنا درکارےیا او نوشت نا باروٹ سرپندی نا ہم ہمو نقاد یا ہمو خوانوک آ (قاری) ٹی اسےبھلو لائخی اَس سوگومرے۔ دنکہ اسے دانا اسےنا قولءِ او پاہک تنقیدآن مست پٹ و پول ، دھوبہ غان مُست پکّ کننگ و اختلاف آن مُست دلیل تخنگ نا گرج سوبرو بندغی اسےنا نشانی ئے۔
برینہ مضمون نا پارہ غا دنکہ یوسف مینگل نا پانِنگے کہ دنیا ٹی دا دے 21بیست و یک فروری لمی بولی تا بابت اٹ اڈ تِننگانے و ہندُن دا دے ئنا اڈ تِننگ نا چندی سوب آک ہریر اگہ دانا مُچا اہمیت سرپند مننگےتو داڑان لمئی بولی نا بابت چندی پالُوک مونا بریرہ۔

ہراڑِسکان ای براہوئی ادب نا قاری ئسےنا حیثیت اٹ سرپند مریوہ تو داڑے مچا مضمون اٹ براہوئی زبان کِن مروکا کاریم تا نزوری تا ہیت مسّونے، دا ہیت تینا جاگہ غا کہ دنیانا ایلو ادب آتا مثال تِننگانے۔ اگہ اینونا وخت اٹی دافتےآ علمی بنیاد آ ہیت و گپ مرے تو دا پانِنگ مریک کہ براہوئی ادب شونداری ہلیک۔

دُنکہ سوشل میڈیا نا دنیا ٹی یوسف مینگل نا مضمون “براہوئی بولی نا حالیت و لُمئی بولی تادے” شینک ہلوکا دا نوشت آ (ذاکر بلوچ) نا پنٹ فیسبک آ کمنٹ (نوشتئی) ہیت و گپ کنِنگاسُس،، ہندُن ذاکرجان دا پاہک “براہوئی ادارہ غاتا بابت اٹ” اگہ دا عظیم اِننگا تقدس آ ادارہ غاک متوسہ تو براہوئی زبان نا اینو ڈسّ و نشان الّو۔ ولے نن داڑے خلقی ادب نا باروٹ گُڑا دا ارّیفِنگ خوانہ و سوج کینہ کہ ننا خلقی ادب ہرا ادارہ غاتا کُنڈان تخلیق کنِنگا؟
ہرانا اہمیت و حیثیت اینو نا علمی آ دنیا ٹی دےپہ دےآن زیات مریسہ اِننگے۔ دا ئسےجتاؤ بحث ئسے مضمون نا کُوش ہلِنگ نا سوب آن ای ڈاٹی زیات ہیت کنِنگ خواپرہ۔
برینہ ذاکربلوچ نا ہیت ئنا پارہ غا او پاہک اگہ ڈیپارٹمنٹ یا کلاس آتا ہیتاک مضمون اٹ ساڑی ءُ ، اگہ دا ادارہ غاک متوسہ تو اینو براہوئی زبان نا ہچّو ڈس و نشان اس الّو۔ جند ئنا اختلاف آک تینا جاگہ غا ای داڑے دا پاوہ کہ انت براہوئی زبان ءِ ننے اسکان ادارہ غاک سر کرینو؟

انت براہوئی زبان اٹ اِے وختا عظیمءُ ادارہ مروئے؟
ہراتم نن خلقی ادب نا پُر چسّی ءِ خنینہ، یا خلقی ادب نا خوڑتی اٹ جاچ ءِ ہلینہ، یا خلقی ادب نا جوانیک اٹ پٹ و پول نا بنا مریک گُڑا داڑے ننے ہندُنو تخلیق دھو بسّونءِ کہ اینو نا ہرا دا وخت ئنا تخلیق ءِ دانا وسّ آن پیشنءُ۔ ہراوخت نن خلقی ادب ئے مونا تخینہ دانا ہڑدُسرآ بشخ آتیٹی ننا پہوال آ مخلوق نا تخلیق و نوشت آک ننے بھاز پُر چس و زیب دار نظر بریرہ۔

نثر اٹ مرے یا نظم اٹ، انت او تخلیق کروکاک ام ہراکہ خلقی ادب نا خالق پانِنگرہ عظیم ءُ ادارہ اسےآن تعلق تخانو؟
انت او ام ایم فِل یا پی، ایچ ڈی مسّونو؟
دافک تو داسہ براہوئی زبان اٹ ٹِک تِسّونو۔
اسیکان نن خوڑتی اٹ اُرِن کہ براہوئی ادب ننے ہراکان دو بسّونے؟ ہندُن اگہ براہوئی زبان ادارہ غاتا سوب آن ساڑی ئے یا براہوئی زبان ءِ ادارغاک زندہ تخانو انت اینو ایم فِل یا پی، ایچ، ڈی نا عالم و چاہندارَس متل یا وساہت اس تخلیق کرینے؟

ہراکہ ننے خلقی ادب آن رسینگانو اینو ام ننا ملاسی ءِ جوان وڑٹ مُر کیرہ۔ زند ئنا ہر پالُوئے اندا متل و وساہتاک ٹِک و نگار کرینو ہرافتےٹی غُٹ راج آدینک اسےنا وڑٹ کروشک ایتک۔ ہرافتےٹی لائخی، چاہنداری، دانائی نا ہیتاک خوندی ءُ۔

دنکہ چاہندار آتا پانِنگے متل و وساہت ہرا ادب اٹی متو گُڑا او ادب بےبے و بےچس سلِک۔ ہندُن نن دا ام پانِنگ کینہ کہ ننا زبان خلقی ادب نا گنج آتیان شُپّءِ۔
دُنکہ براہوئی خلقی ادب اٹ نظم ئنا دنیا ٹی ہرا وختا دڑینہ تو لیلی مور نا ہزارآ ٹپہ غاک ہزار آ موضوع تیا تفِنگانو “بیبل نا شعر مرے یا دیردیر کیوہ کنے دیر ایتے”، اوکان مُستی ریکی نا شعر مرے یا نورا نورا ہمزہ نا مارے “یاکہ مُلّا مزار بنگلزئی نا لاٹ ئنا بھگی نا نظم ” دافتا تخلیقی کُڑمبی آن کسس پیش تمِننگ تپّک۔ دافک نے ہرا ہرا دنیا تے نشان ایترہ۔یا ہرا وخت خلقی قصہ غاتا ہیت مریک گُڑا دافتے ہراتم قصہ شاغوکاک پارہ اندُن اوڑے بنوکاک ہنداخس ڈُبّ الیرہ کہ اوفک دا قصہ غاتا خیالی آ دنیا ءِ اسےحقیقی ءُ دنیا ئس سرپند مریرہ۔
انت دا ہمو ادارہ غاتا تخلیقے ہرانا سوب آن براہوئی ادب زندہ سلوک ءِ؟ یا براہوئی ادب ننے رسینگانے۔
دا ہمو عظیم اِننگا ادارہ غاتا مہروانی ئے یا خلقی ادب نا؟
ہراڑِسکان ادارہ غاتا تقدس نا ہیتءِ او گِڑائے ای ام قبول کیوہ،، ولے براہوئی زبان نا اسے باتی ئسےنا حیثیت اٹی دا ادارہ غاک ورندی گو اریر۔ بلکہ براہوئی بولی نا ہر اسے اسے بندغءِ دا حق ارے کہ او تینا شاعر، ادیب دانشور آن سوج کنِنگ کیک۔
اوڑان تینا زبان نا بابت اٹ حساب و کتاب کنِنگ کیک،ہندا خاطران ادارہ غاتا تہیٹی شاعر، ادیب ، دانشور و استاد آتیان دا سونج رونج کنِنگ و ارّیفِنگ حقءِ کہ اینو نا دنیا ٹی کنا زبان نا حیثیت انتءِ؟ کنا زبان ءِ اونا شونداری کن انت گام ارفِنگانے؟ دا ہیت پکّءِ کہ راجی شعور بشخنگ اٹ اندا کڑدہ نا زمہ واری مسّونے۔ ای ہم تینا دانشور نا دانشءِ اُنِنگ و پَرکنگ خواوہ کہ اونا قلم اٹ اینو اسکان اخس راجی شعور تالان مسّونے؟
اگہ نن تینا ادارہ غاتے مقدس جوڑ کین تو اوڑے تنقید نا کنجائشت سلپک۔
ولے اینو نن ادارہ غاتا کنڈان براہوئی ادب کن مروکا کاریم تا بابت اٹ ضرور ہیت کینہ کہ ہرا ادب ننے اینو ادارہ غاتا کُنڈان دھو بنِنگے انت واقعی دافتے علمی دنیا قبول کیک؟

ہندُن یوسف مینگل نا نوشت(مضمون) آ ” ادارہ غاتا تقدس نا ہم ہیت کنِنگاسُس″ ہراڑِسکان ای سرپند مریوہ کہ دافتیان زیات انسان تینَٹ مقدس ءِ دا خاتران دا غُٹ ادارہ غاک انسان نا تینٹ جوڑ کروکو۔ دا ورندی نا جوانی و خرابی نا زمہ وار انسان تینٹءِ۔ تو اگہ ادارہ غاتیا ہیت کین تو اوفتا تہٹی ساڑی کارندہ غاتیا ہیت مریک۔

داخاطران کہ علم ،شعور و ادب نا کانیک (چشمہ) انداکان وہِنگو اگہ جاگہ اَس ادارہ ئس راجی علم و شعور اٹی ودُکی نا سوب منِنگ اف بلکہ اوڑے بیرہ ہمو کاریمک مریر ہراڑان ادب و راج اٹی فائدہ مف تو اوڑے ارّیفنگ و سوج کنِنگ ہر براہوئی پاروک و براہوئی ادب نا قاری نا حقءِ۔ ہندا خاتران ہچّو گِڑاسے مقدس جوڑ کپّن تانکہ تنقید نا کسرک بند مفس ہراڑِسکان کہ ادارہ غاتے عزت و تکریم نا نگاہ ٹی اُنِنگے ہموڑے اوفتا کریم تیا ہم تنقیدی نگاہ شاغنگے۔
تو ئسے جوانو گچینو عمل اسے ہراڑان بحث و مباحثہ نا عمل بنا مریک تو ادارہ غاک شونداری نا کُنڈا گام ارفیرہ۔
براہوئی ادب اٹی دا وختا اِرا گِڑا مونا بنِنگو اسِٹ ادبی وئیلاک ایلو ذاتی، داڑے دا گِڑا اوار تمنِنگے کہ نن تینا ذاتی وئیلاتے ام ادبی و علمی فورم آتیا چِست کینہ و ہمو فورم آ مروکا ہیت و گپاتیان خنتےتر کینہ بایدے علمی دنیا ٹی یا ہراتم ادب نا زیہا ہیت و گپ مرے تو اوڑے اسے اندونو شرہ اس برجا تخِنگے داٹی بیرہ زبان و ادب نا وئیلاتا ہیت مرے۔
اگہ ذاتی وئیلاتا ہیت و گپ کین تو داڑان بھلو وخت اس زیان مریک،، اندُن ذاکرجان داڑے تینا ذاتی وئیل ئنا سوب آن علمی بحثءِ جتاؤ کُنڈ اسے آ درینے۔ اینو اگہ براہوئی ٹی تنقید نا رُجاناک مونا بنِنگو بایدے دافتے اُنِنگے و دافتےآ شرہ مرے۔
تاکہ اسے بندو کھوٹو اسےٹی تخوکا براہوئی ادب نا مون پاشی مرے جوانِنگا و خراب اِنگا گِڑاتا فرق کنِنگے۔ انتَس کہ داٹی ارے غُٹ ئنا مونا برے، اگہ اندُن مدام براہوئی ادب ءِ اسے کھوٹَو اسےٹی بُوز پدّام کرین اِلّان تو یخین اٹ زبان و ادب کِن شونداری نا ہیتاک بے مقصد مریرہ۔
اینو براہوئی آخا بلکہ ہَر زبان نا ہر نوشت نا زیہا ہیت منِنگے۔

دُن اف کہ نقاد نا ہیتاتیان فن پارہ نا حیثیت نا شین کم مریک، بلکہ بھاز جاگہ نقاد نا فیصلہ غان فن پارہ غاک دُن مونی ہِنانو اینو انگریزی ادب آن الیس دنیا نا چُنکا چُنکا ادب آتےٹی تنقید نا روایت سوگو مسونءِ او نن تینا بنائی دور اٹی تنقید آن تینے مُر تِخنگ نا کوشست ءِ کنِنگ اُن دانا سوب مطالعہ و پٹ و پول نا کمبوتی ئے۔ہراڑے گِڑاتے جوانی ٹی سرپند منِنگ نا لائخی ودی منِنگ اف۔
تو ولدا تینا سوچ و فکر نا بابت گُڑا جاچ ہلِنگ اِک او دافتے حقیقت سمجھنگ اک۔ براہوئی ادب اٹی دُنو روایت بھاز مِلک کہ داڑے اسے نوشتوک اسےنا پاروکا ہیت آتے ہُو بہُو قبول کنِنگانے۔

حالانکہ فلسفہ مرے یا علم دا گِڑائے اسُل منیپسہ کہ بیدس بحث و مباحثہ غان گِڑاتے قبول کنِنگے۔
اینو براہوئی ادبی دنیا ٹی ہرا ہیتاک منِنگو ای دافتے ہر لحاظٹ تینا ادب کن جوان سرپند مریوہ دا خاتران کہ اولیکو وار ادب نا زیہا ہیت منِنگے۔
“پانِنگِک کہ زندہ اِننگا ادب تینا تنقیدے تینَٹ ودی کیک” تو دا احساس براہوئی ٹی اولیکو وار منِنگے کہ براہوئی ادب ام زندہ ادب اسےکہ او داسہ تینا نقادءِ ودی کنِنگےولے دادے تونِنگ نا کوشست آک ادب و تنقید نا دشمنی نا سوب جوڑ مریرہ۔

تعارف: nishist_admin

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*

x

Check Also

پرائیویٹ اسکول ملازمین کے گھروں کے چولہے ٹھنڈے ہونے لگے۔

پرائیویٹ اسکولز ملازمین کے گھر کے چولہے ٹھنڈے ہونے لگے پنجگور (نشست) ...

مستونگ میں سیاسی بنیادوں پر راشن کی تقسیم مستردکرتے ہیں:مظفر بلوچ

مستونگ میں سیاسی بنیادوں پر راشن کی تقسیم مستردکرتے ہیں:مظفر بلوچ بی ...

بلوچستان میں ڈاکٹروں کو کروناوائرس سے بچاو کی کٹس و دیگر ضروریات کا سامان فراہم کیا جائے۔ بی ایس او پجار

بلوچستان میں ڈاکٹروں کو کروناوائرس سے بچاو کی کٹس و دیگر ضروریات ...

احتجاجی ڈاکٹرز کی گرفتاری کی شدید الفاظ میں مذمت:بی ایس او

احتجاجی ڈاکٹرز کی گرفتاری کی شدید الفاظ میں مذمت:بی ایس او بی ...

لوہڑ کاریز لائبریری کی بندش اور غیر فعال ہسپتال کو قرنطینہ سینٹر بنانا کسی صورت قبول نہیں- بی ایس او

لوہڑ کاریز لائبریری کی بندشاور غیر فعال ہسپتال کو قرنطینہ سینٹر بنانا ...

error: Content is protected !!