ماہ گل

Spread the love

نوشت نزیرزین

آہڑنا باسونا دے تیٹی نت شپاد مخ ۶ِ تفوک بینگون بے سیک آ جون تون چُنا کش آ نیاڑیس لاب کننگ ٹی اے 

ایلو پاره غان گدان ٹی جوکہ بروتاتہ ریس ترسہ امبلس چولم نا مول آن سرور هلسہ مدہوش و دنیاغان بے خبر مخنگ نا ٹهاک ٹهکا ٹی گم ءِ نیاڑی نا ملاسی آن نڑی بارس رمب کرسہ بریک کہ دیرس کنیو او چنا نا گُهٹ ءِهم دیخس چُڑفِو
ولہ امبل نا ظلم وزیاتى اونا گام تہ تفرہ
ماه گل تینا لمہ باوه نا اسٹ انگا اولادئس
لمہ جیجا ودی مننگ تون خن تہ تر کیک ولہ باوه غریب اودے لمہ نا کمی ئے اسل نشان تفک
تینا باه ئنا باخوه پلاکہ ماه گل ئے تسکہ
ماه گل دادولو آ چناتیان بار ضد کریکہ ولہ باوه ہم اونا ضد اونا خوشی کن انت کہ وس ٹی اس کریکہ
دیک تدینگسہ هنار ماه گل لائخی نا دنیا ٹی گام ئے تخک
باوه اسہ دے توار خلیک
کنا مل بر ذرس خنو نے اینو سما اف انتئے اُست پائک کہ نے آن کاوه
ماه گل الاہوش مس حیران مس سلیس
ابا نے آن سوا ای نیاڑی ارانگ ہنوٹ دیرا ہنوٹ امر کروٹ دہونوهیت کپہ ابا
باوه مخسہ اونا کاٹم آ دُوءِتِخِک او دیرس خواہک
ماه گل رمب کرسہ دیر ہتیک کہ باوه خن تہ تر کرینے
ابا دیر کُن ابا…. ابا… ابا…
ماه گل باوه ئے ٹوہک ولہ باوه نا روح پیش تمک
ماه گل نا خنتا موجس تولک اونا دنیا تہار مریک
مجبور و تنیا اسٹ انگا نیاڑی حیران سلک دانگ اینگ چَک خلیک هر پارا تارمئی ئے
ماه گل نا اِلّہ (باوه نا ایلم) اراکہ ماه گل نا باوه تون ڈغار سےآ غاو کریکہ
تُو ئسے آن گُڈ بریک ماه گل ئے دوئى کیک او منہ توه آن پد اودے پیرو بندغ سے تون نکاح ایتک
باوہ نا دو آ رُدوکا ماہ گل اینو ظلم وستم تا باٹی غلام و چوکری نا زندءِ تدیفک
ماہ گل نا خولمی رنگ پِٹسہ کاہک
ہر ہیت و بہانہ غا اودے خلکورہ سزا تسورہ ولہ سگ و صبرئناگودی مرسہ غم تہ سگسہ ہناکہ
سال مَنٹ آن گُڈ ماہ گل چناسے نا لمہ مس اُست ٹی خوش مس کہ داسہ کنا بھاتیک کنے آن خوش مرور ولہ غریب نا بخت چھپی آن چھپی سلیس
خدادا (ماہ گل نا ارِغ) زمیندارس ئَس زرودولت نا نشہ اودے کور و کر کریسس نہ مظلوم نا آہ وزاری تہ خف توریکہ نہ کہ محسوس کریکہ
وتاخ ٹی تینا موالی آ سنگتاتہ تون نن درست آنن نشہ ٹی مسکہ ماہ گل ئے خوف آن تُغ بتوکہ کہ خداداد برو ای خاچوک مروٹ
ماہ گل وس کریکہ کہ خداداد نا ہر خواہش پورا مرے انتئےکہ نیاڑی نا دنیا بہشت اونا بھاتی مریک ولہ خدادا ظلم ئنا چِٹ ءِ سوگو دوٹی کریسس
ماہ گل اسہ نن ئَس خاچوک ئَس کہ تُغ ٹی لمہ باوہ تا بشخندہ کرسہ بریرہ ولہ ماہ گل اوفتیان گلہ کرسہ مون ءِ ہڑسک ماہ گل نا لمہ موستی مریک اودے دولخی کیک ماہ گل انتئے مونءِ ہڑسہ سا ننے آن
ماہ گل اُست ئنا لار آن فریادس خلیک جیجا نم کنے تنیا دا ظالم آ دنیا ٹی امر الارے ہنارے نمے سما ئس کہ نمے آن بید کنا کس افک
اوچتون دروازہ نا توار مریک ماہ گل تُغ آن حجم کیک کہ خدادا نشہ ٹی دھکہ ہلیسہ بریک ماہ گل نا جنڈاتیٹی ہلیک اودے بش کیک محتاج و بندی آ نیاڑی خاموش بس صبر کرسہ کاہک
خدادا اسہ دے اودے بھاز سزا ایتک اُراغان کَشِک ماہ گل نت آ تمک ہوغک فریادکیک کہ کن تون ظلم کر کنے ہچ تفہ ای ہِچ خواہپرہ ولہ اُراغان کشپہ کنے ای دیرا ہنوٹ امر کروٹ خدا نا دروئی قسم ایتک ولہ خداداد ظلم ٹی غرق اراکان بِنِک
ماہ گل ءِ اونا معصوم آ چُنا غان مر کیک اونا خومب ءِ ویران کیک
ماہ گل آڑسندہ کشِک پدی چَک خلیسہ بریک اِلّہ (باوہ ناایلم) نا اُراغا
ولہ اِلّہ ہم اودے اوڑتون ظلم وزیاتی ٹی کسر الپک ماہ گل نا بدانگا حال گیشتر مرسہ کاہک چُنا نا غم اودے دے پہ دے کُنِسہ کاہک
لاغراجون تون وارس دا اُراٹی سر ہلیک وارس اے اُراٹی گنوک مرسہ کاہک
اسہ دے بیزارمریک سر ہلیک خدادانا اُراغا کہ نوا چُنا ءِ خنِو ذرس ہوش آ بریو ولہ خداداد اودے شغان پیغام کرسہ واپس گدریک چُنا خنک لمہ ءِ رُمب کرسہ بریک ولہ اوڑان مُست خداداد چُناءِ تورک
ماہ گل نا خن تا مونا اونا چُنا ءِ سزا ایتک ماہ گل فریاد کیک زاری کیک کہ کنا چُناتون ظلم کپہ
ماہ گل چُنانا حال ءِ خنک ہربشی مریک اونا گوڈاک لگرہ ہوش آن کاہک گنوک مریک بے وسی نا زندان بے سد مریک
ہوش و ساران مُر گنوکی نا زند منہ تو اسکان اوڑتون اوار مریک
او اسہ دے ماہ گل چنانا غم ءِ سینہ ٹی جھلسہ دا دنیاء اِلّک کاہک
خدادا نا معتبری منہ دے ئنا مریک دے پہ دے اونا ڈغاک خشک مرسہ کارہ دے پہ دے نزور مرسہ کاہک
دوست عزیز سیال و بزغراک اودے اِلّسَہ کارہ خدا نا قہران اسہ دے پِنڈنگ آ بریک سلیک
اِرغ نا باخو سے کن سِکّک کاہک ولہ ماہ گل نا حقاک داسکان ہم اونا کاٹم آ جمر نا ڈھولٹ مڑوک سلوکو
ماہ گل نا بددعاک اونا تُغ تہ حرام کرینو
انتئے کہ مظلوم نا بددعا عرش ءِ ضرور سر مریک

ایک تبصرہ

جواب لکھیں

آپ کا ای میل شائع نہیں کیا جائے گا۔نشانذدہ خانہ ضروری ہے *

*

error: Content is protected !!